ស្រុកខ្មែរពិតជាគោរពច្បាប់ណាស់ គ្រាន់តែធ្វើឱ្យប្រឡាក់ស្ករកៅស៊ូក៏ជាប់គុកដែរ
រឿងរ៉ាវនៅជុំវិញខ្លួនយើង សុទ្ធតែមានច្បាប់ទាំងអស់ ពេលខ្លះខ្ញុំអានសៀវភៅច្បាប់នាពេលទំនេរ ទើបដឹងថាស្អីក៏មានច្បាប់ដែរ អានយូយូ ចង់ខ្លាចផង។
ប៉ុន្តែក្រឡេកមើលទៅលើការអនុវត្តន៍វិញ ខ្ញុំមិនហ៊ាននិយាយទេថា បានប៉ុន្មានភាគរយ ទុកអោយបងប្អូនខ្មែរ ដែលកំពុងរស់នៅក្នុងស្រុក និងក្រៅស្រុកជាអ្នកវិភាគ និង វិនិច្ឆ័យដោយខ្លួនឯងទៅចុះថា ស្រុកយើងបច្ចុប្បន្នវាយ៉ាងម៉េច។
កាលពីកន្លងទៅថ្មីៗនេះ ខ្ញុំឃើញព័ត៌មានមួយដ៏ភ្ញាក់ផ្អើលដែលបានចុះផ្សាយទូទាំងប្រទេសអំពី បុរសវ័យ ៦២ឆ្នាំម្នាក់ត្រូវបាននគរបាលប៉ុស្តន៍ ប្រចាំនៅវត្តភ្នំឃាត់ខ្លួន និងបញ្ជូនទៅតុលាការផ្ដន្ទាទោសឱ្យជាប់គុករយៈពេលខ្លី និងផាកពិន័យជាប្រាក់ផងដែរ។ រីឯមូលហេតុនៃការចាប់ខ្លួននេះ ព្រោះបុរសនោះបានញាំ ស្ករកៅស៊ូ រួចខ្ជាក់គ្រវាត់ចោល ប៉ុន្តែចៃដន្យអីស្រាប់តែស្ករកៅស៊ូនោះបានជាប់ទើរនៅលើ ផ្លាកសញ្ញាមិត្តភាពកម្ពុជា-ជប៉ុន ឃើញបែបនេះគាត់ក៏ដើរទៅបេះចេញ ស្រាប់តែតម្រួតបានឃើញ ក៏ឃាត់ខ្លួនគាត់តែម្ដង និងបានបញ្ជូនគាត់ទៅតុលាការដើម្បីកាត់ទោស បុរសនោះនៅតែបានបដិសេធដដែលៗថា គាត់ពុំមានបំណងទៅបិតស្ករកៅស៊ូនោះឡើយ គ្រាន់តែជារឿងអចេតនា តែគាត់បានទៅបេះចេញស្រាប់តែប៉ូលីសមកចាប់គាត់ ទោះជាបែបនេះក្ដី ក៏តុលាការនៅតែកាត់ក្ដីអោយគាត់ជាប់ទោសដដែល។
បុរសដែលត្រូវបានឃាត់ខ្លួន
ឃើញទេបងប្អូន? នេះច្បាប់ស្រុកខ្មែរយើងឡូយទេ? ពិតជាគោរពច្បាប់ណាស់ ណា៎..មន្ត្រីរាជការ ពិតជាអ្នកគោរពច្បាប់ អនុវត្តន៍ច្បាប់មែន ហ្ន៎…? អានអត្ថបទនោះរួចភ្លាម ធ្វើឱ្យខ្ញុំនឹកឃើញដល់រឿងអំពើហិង្សា បាញ់បោះ ក្អេងក្អាង ក្នុងសង្គមខ្មែរ ភ្លាម ឧទាហរណ៍ជាក់ស្ដែង កាលពីថ្មីៗនេះ ព័ត៌មានចុះផ្សាយផ្អើលអស់ក្នុងស្រុក និងក្រៅស្រុកអំពីលោក ឈូក បណ្ឌិត ដែលជាចៅហ្វាយក្រុង បាវិត ថាបានបាញ់កម្មកររោងចក្រ៣នាក់។ ហើយលោកឧបនាយករដ្ឋមន្ត្រី ស ខេង ក៏បានធ្វើសន្និសីទកាសែតយ៉ាងច្បាស់ថា លោក ឈូក បណ្ឌិតនេះជាជនសង្ស័យដែលកំពុងតាមនាំគ្នាមកកាត់ក្ដី។
ប៉ុន្តែពីរមួយថ្ងៃ ទៅមួយថ្ងៃគឺ ស្ងាត់ដូចចោរលួចមាន់! តែតាមសារព័ត៌មានមួយចំនួនទៀតបានចុះផ្សាយ នោះបានបង្ហាញថា តុលាការនៅពុំទាន់ដោះស្រាយបាននៅឡើយទេ ហើយក៏មិនបានចោទប្រកាន់លោក ឈូក បណ្ឌិតនោះថាជាជនដៃដល់បាញ់បោះនោះទេ បានត្រឹមតែចោទប្រកាន់ថា ជាបទល្មើសបង្ករបួសស្នាមដោយអចេតនាប៉ុណ្ណោះ។
ដូចនេះសូមបងប្អូនខ្មែរជួយវិភាគ និង គិតទៅលើករណីទាំង២ ខាងលើនេះទៅមើលថា តើច្បាប់ស្រុកខ្មែរដំណើរការយ៉ាងដូចម្ដេចដែរ?
នៅក្នុងឃ្លាកំណាព្យក្រមងុយ ខ្ញុំនៅចាំបានបន្តិចថា៖ អ្នកធំតែងច្បាប់ ចាប់តូច… ។ មិនខុសទាល់តែសោះ ។ ឈូកបណ្ឌិតបាញ់ ជីវិតមនុស្សលេង ដូចសត្វចាប បែជាចេញកូនទោស បង្ករបួសស្នាមដោយអចេតនា ។ តែមានអំពើអយុត្តិធម៌ជាច្រើនទៀត ដែលមហាសម្បូរ នៅក្នុងស្រុក ណាចក្រអច្ឆរិយៈ មួយនេះ ។ សាធុ អនុមោទនា!!!!