ខ្ញុំពិតជាខុសធ្ងន់ណាស់! ហើយខ្ញុំគ្មានអ្វីក្រៅពីសុំការអត់អោនទោសពីគេនោះទេ
នៅពេលដែលយើងសួរអ្នកដែលរស់នៅក្នុងទំនាក់ទំនងស្នេហារយៈពេលយូរអំពីដៃគូរបស់ពួកគេ ពួកគេមិនដែលលើកឡើងច្រើនពីការរអ៊ូរទាំនោះទេ។ វាមិនមែនមានន័យថាដៃគូរបស់ពួកគេល្អឥតខ្ចោះនោះឡើយ ប៉ុន្តែនិន្នាការរបស់ពួកគេក៏មិនមែនផ្អែកលើកំហុសនោះដែរ។
សូម អត់ទោស អោយ ខ្ញុំ ផង
ការរពិតទៅ ដៃគូដែលរស់នៅក្នុងទំនាក់ទំនងស្នេហារយៈពេលយូរ មិនត្រឹមតែចំណាយភាគច្រើនគិតពីរឿងល្អរបស់ដៃគូនោះទេ ពួកគេថែមទាំងហាក់ដូចជាមើលឃើញភាពពេញចិត្តទោះបីជាដៃគូរបស់ពួកគេមានកំហុសក៏ដោយ។
មនុស្សយើងពេលខ្លះ គិតថាកំហុសដ៏តូចតាចមួយប្រហែលជាមិនមែនជាបញ្ហាធំដុំឡើយ តែត្រូវចាំថា ពេលខ្លះរឿងតូចតាចក៏អាចក្លាយទៅជា កំហុសដ៏ធំសម្បើដែលអាចធ្វើអោយដៃគូររបស់ខ្លួនអាក់អន់ស្រពន់ចិត្តបានដែរ។
ដូចគ្នានឹងករណីខាងលើ ខ្ញុំពិតជាមានការសោកស្ដាយយ៉ាងខ្លាំងដែលបានប្រព្រឹត្តិទាំងមិនដឹងខ្លួន។ ដោយដំបូងឡើយខ្ញុំគិតថា មិនសូវជាបញ្ហាអ្វីនោះទេ! ស្រម៉ោលអតិតរបស់ខ្ញុំបានដកជាប់ក្នុងអារម្មណ៍ជានិច្ច ខ្ញុំបានសម្រេចចិត្តថា នឹងលាតត្រដាងការពិតអំពី កំហុសរបស់ខ្ញុំចំពោះមនុស្សជាទីស្រលាញ់ តែមិនដឹងជាចង្រៃស្អី បែរជាខ្ញុំនេះ មានគំនិតចោលម្សៀត មិនព្រមនិយាយភ្លាមៗនោះទេ បែរជាចង់លាក់ទុករឿងនេះទុកមួយឡែកសិន ហើយរងចាំឱកាសថា ចាំដល់ថ្ងៃណាមួយ ចាំខ្ញុំនិយាយប្រាប់បន្តិចម្ដង។
តែអ្វីៗពេលវេលាចេះតែដើរទៅមុខ ហេតុការទាំងឡាយវា បានដំណើរការឆ្ពោះទៅរក ការខុសឆ្គងទៅវិញ ចុងបំផុតខ្ញុំមិនទាន់បាននិយាយប្រាប់គេផង ស្រាប់តែកាលពីយប់ថ្ងៃទី ០៩ ខែមេសា ឆ្នាំ២០១២ នេះ គេ តាមដាម និងស៊ើបដឹងគ្រប់យ៉ាងរួចជាស្រេចទៅហើយ។ ភ្លាមៗនោះដែរ គេអន់ចិត្តនឹងខ្ញុំ គេខឹងខ្ញុំ គេតូចចិត្តដែលខ្ញុំបានលាក់បាំងគេ។
ព្រោះតែរឿងនេះហើយ ទើបធ្វើអោយខ្ញុំកើតហេតុ មិនសុខចិត្ត ដេកគិតពេញមួយយប់ទល់ភ្លឺ ព្យាយាមដោះស្រាយកំហុសខ្លួនឯង ហើយគិតថា «ខ្ញុំនឹងមិនធ្វើបែបនេះទៀតទេ ហើយនឹងឈប់ជារៀងរហូត» តែរយៈពេលដែលខ្ញុំអង្គុយគិត និងដេកដៃគងថ្ងាស់ពេញមួយយប់ ខ្ញុំគិតមិនចេញទេ ព្រោះគ្មានវិធីណាដែលខ្ញុំអាចធ្វើបាន ក្រៅពីពាក្យថា សុំទោស! ហើយឈប់ប្រព្រឹត្តិទៀតឡើយ។
គូស្វាមីភរិយា ឬគូរស្នេហាចាំបាច់ណាស់ ត្រូវស្មោះត្រង់នឹងគ្នា មានទំនុកចិត្តលើគ្នា ចេះពិភាក្សាប្ដូរយោបល់គ្នា មិនមានអាថ៌កំបាំងនឹងគ្នា ផ្ដល់កិត្តិយសដល់គ្នាទៅវិញទៅមក និងមិននិយាយប្រមាថមើលងាយគ្នា និយាយស្ដីដោយពាក្យពេចន៍ពិរោះ ។ បើមានម្នាក់ធ្វើអ្វីខុសឆ្គង ម្នាក់ទៀតត្រូវជួយដាស់តឿនគ្នា ហើយត្រៀមជាស្រេច ដើម្បីដោះស្រាយកែលំអរ ។
ប៉ុន្តែខ្ញុំវិញ មិនគួរណាថ្លើមធំ ហ៊ានលាក់បាំងគេរហូតមក ថ្វីត្បិតតែកំហុសរបស់ខ្ញុំ មិនបានធំដុំ ដល់ថ្នាក់ធ្វើអ្វីបំពានដល់ ថ្នាក់បែកបាក់ចំណងមិត្តភាពក៏ដោយចុះ វាគ្រាន់តែជាកំហុសមួយ ព្រោះលាក់បាំងនូវ ប្រវត្តិចាស់របស់ខ្ញុំតែប៉ុណ្ណោះ ខ្ញុំដឹងថា វាជារឿងមិនអាចទទួលយកបានទេក្នុងអារម្មណ៍របស់មនុស្សដែលកំពុងស្រលាញ់ខ្ញុំ។
នេះជាបទពិសោធន៍មួយ សង្ឃឹមថាមនុស្សទូទៅ នឹងមិនដែលកុហកមនុស្សដែលខ្លួនស្រលាញ់នោះទេ ទោះបីជារឿងតូចតាចក្ដី ព្រោះថាបញ្ហាផ្សេងៗលោកអ្នកមិនអាចមើលឃើញឡើយ Water and words are easy to pour but impossible to recover. ដូចនេះហើយ បើមានអ្វីដែលមិនស្រួលនោះចាំបាច់ណាស់ត្រូវពិភាក្សាគ្នា និយាយជាមួយគ្នាអោយចំៗ កុំព្យាយាមលាក់ទុកក្នុងចិត្តហើយ រងចាំឱកាសផ្សេងអោយសោះ ដូចពាក្យចាស់លោកពោល ធ្វើស្រែទាន់ក្ដៅដី ពាក្យនេះពិតជាត្រឹមត្រូវណាស់ បើអ្នកនៅ រងចាំយូ នោះអ្វីៗនឹងធ្វើអោយអ្នកខកចិត្តមិនខាន។
