ព័ត៌មានរឿងដីធ្លីនៅស្រុកខ្មែរផ្អើលពិភព អីនធឺណិត
មួយរយៈចុងក្រោយនេះខ្ញុំឃើញថា ស្រុកខ្មែរយើងកំពុងមានអំពើហឹង្សារជាច្រើនបានកើតឡើង ព្រឹត្តិការណ៍នោះសុទ្ធតែនិយាយអំពី ការអភិវឌ្ឍន៍ដោយបណ្ដេញពលរដ្ឋចេញពីភូមិហើយយកដីអោយក្រុមហ៊ុនអភិវឌ្ឍន៍។ គ្រប់សារព័ត៌មានសុទ្ធតែបានចុះផ្សាយអំពីករណីនេះសឹងតែទាំងអស់ ខ្លាំងជាងគេបំផុតគឺក្នុងបណ្ដាញសង្គម Facebook ឃើញថាមានបង្ហោះរូបថត និង វីដេអូឃ្លឺបជាច្រើន! សូមមើលសេចក្ដីដកស្រង់ត្រួសៗដូចខាងក្រោម៖
អភិវឌ្ឍន៍
តវ៉ា អោយ បញ្ឈប់ ការ បណ្ដេញ ពលរដ្ឋ
ប៉ូលីស វាយ ក្មេង
ប្រភពពីវិទ្យុអាស៊ីសេរី៖
ពលរដ្ឋនៅសហគមន៍បុរីកីឡា បានស្វះស្វែងរកកិច្ចអន្តរាគមន៍ពីអភិបាលសាលាក្រុងជួយរកដំណោះស្រាយដល់ពួកគាត់ក្នុងការអភិវឌ្ឍតំបន់បុរីកីឡានោះ។ មុនពេលដែលសមត្ថកិច្ចបង្ក្រាប ស្ត្រីអ្នកតវ៉ាពីរនាក់បានដោះអាវដើម្បីទាមទារឲ្យមន្ត្រីសាលាក្រុងចេញមកជួបពួកគាត់ ដើម្បីជជែករកដំណោះស្រាយជាមួយអ្នកភូមិ ប៉ុន្តែមិនមានមន្ត្រីណាម្នាក់ចេញមកជួបពលរដ្ឋឡើយ។ ក្រុមសន្តិសុខខណ្ឌដូនពេញ និងសមត្ថកិច្ចកងអន្តរាគមន៍ប្រដាប់ដោយដំបង និងខែលការពារផង បានផ្ទុះហិង្សាជាមួយពលរដ្ឋអ្នកតវ៉ា ហើយបានចាប់អ្នកតវ៉ាប្រមាណ ៥នាក់ដាក់រថយន្តបញ្ជូនទៅស្នងការនគរបាល។
អ្នកស្រី តូច វណ្ណា ពលរដ្ឋតំបន់បុរីកីឡា បានថ្លែងថា ការស្វែងរកកិច្ចអន្តរាគមន៍ពីគ្រប់ស្ថាប័ននេះ គឺដើម្បីឲ្យក្រុមហ៊ុនទទួលខុសត្រូវ និងគោរពកិច្ចសន្យានៃការអភិវឌ្ឍ៖ «គឺគ្មានអ្វីក្រៅពីខ្ញុំមកទាមទារទីលំនៅរបស់ពួកខ្ញុំវិញទេ។ ទី១ គឺខ្ញុំទាមទារឲ្យក្រុមហ៊ុនផានអ៊ីម៉ិច សាងសង់អាគារពីរបន្ថែមទៀតឲ្យគ្រប់ ១០អាគារដល់ពួកខ្ញុំ។ ទី២ ឲ្យរដ្ឋាភិបាលត្រូវតែដោះលែងពួកខ្ញុំដែលជាប់នៅពន្ធនាគារព្រៃស គឺឲ្យដោះលែងពួកខ្ញុំមកវិញមក ព្រោះថា ពួកខ្ញុំអត់មានទោសកំហុសអ្វីធំ ដែលត្រូវយកពួកខ្ញុំដាក់គុកនោះទេ។ ទី៣ គឺអ្វីដែលបានខូចខាតនៅបុរីកីឡា គឺដូចជាផ្ទះសម្បែងទ្រព្យសម្បត្តិរបស់ពលរដ្ឋទាំងអស់ដែលក្រុមហ៊ុនផានអ៊ីម៉ិច ឈូសកម្ទេចអស់រលីង»។
ប្រភពពី វិទ្យុ វីអូអេ សម្លេងសហរដ្ឋអាមេរិក
ក្រុមមន្ត្រីប៉ូលិសប្រដាប់ដោយខែល និងដំបងឆក់ជាច្រើនរាប់រយនាក់បានមកបំបែកការតវ៉ារបស់ក្រុមអ្នកស្រុកក៏ប៉ុន្តែប្រជាពលរដ្ឋបានតបតទៅវិញ ដោយគប់ដបទឹកសុទ្ធ នឹងយកសម្លៀកបំពាក់មកវាយតបនឹងសមត្ថកិច្ច។ ពួកគេបានស្រែកដាក់ក្រុមសមត្ថកិច្ចទាំងនោះថា៖
«មិនចេះខ្មាសគេទេ! មករករឿងប្រជាជន ទាំងរបាំងការពារទៀត ចំណែកឯប្រជាជនដៃទទេសុទ្ធសាធ»។ ការប៉ះទង្គិចគ្នាសារជាថ្មីម្តងទៀតរវាងអ្នកភូមិបុរីកីឡាជាមួយនឹងសមត្ថកិច្ចដោយមានការចូលរួមពីអ្នកភូមិបឹងកក់ផងនោះ ពុំមានរបាយការណ៍ណាមួយបង្ហាញពីអ្នករងរបួសទេ។ ក៏ប៉ុន្តែមានភូមិបុរីកីឡាចំនួន៥នាក់ និងអ្នកភូមិបឹងកក់ម្នាក់ប៉ុណ្ណោះ ត្រូវបានចាប់ខ្លួន។
លោក កើត ឆែ នាយករដ្ឋបាលសាលាក្រុងភ្នំពេញមិនបានធ្វើអត្ថាធិប្បាយណាមួយ ជាមួយនឹងវីអូអេសំឡេងសហរដ្ឋអាមេរិកដែលបានសាកសួរអំពីមូលហេតុនៃការចាប់ខ្លួនប្រជាពលរដ្ឋទេ ដោយលោកគ្រាន់តែបញ្ជាក់តាមសំឡេងដើមថា៖ «ថាអ្នកឯងឃើញគេធ្វើអីហ្នឹង! គេធ្វើយ៉ាងម៉េច អ្នកឯងមើលតាមហ្នឹងទៅ។ គេចាប់យកទៅណាដឹងតាមហ្នឹងទៅ វិនិច្ឆ័យអីញ្ចឹងទៅ! លោកឯងឃើញគេធ្វើអីអត់? លោកឯងមានភ្នែកដែរ ខ្ញុំមានភ្នែកដែរ! ឃើញថាម៉េច និយាយអញ្ចឹងទៅ!»។
ប្រជាពលរដ្ឋបាននិយាយថា ញត្តិដែលបានដាក់ជូនទៅសាលាក្រុងកាលពីលើកមុន មិនមានការឆ្លើយតប និងអើពើពីមន្ត្រីសាលាក្រុងភ្នំពេញទេ។ ពួកគេបានស្រែកអំពាវនាវដល់លោកនាយករដ្ឋមន្រ្តីហ៊ុន សែនឱ្យធ្វើអន្តរាគមន៍ក្នុងរឿងនេះ៖ «សព្វថ្ងៃហ្នឹងពួកខ្ញុំវេទនាណាស់! គ្មានទីជម្រកអីទាំងអស់! មានតែម្រាមដៃដប់ សូមអំពាវនាវឲ្យសម្តេចជួយ»។
