ជយោ! ទំព័រដើមអម្ពិលចាប់ផ្ដើមប្ដូរមកប្រើអក្សរយូនិកូដវិញហើយ!
គេហទំព័រដើមអម្ពិលគឺជា ទំព័រមួយដែលល្បី និងពេញនិយមណាស់ សម្រាប់អ្នកដែលចូលចិត្តតាមដានព័ត៌មានប្រចាំ រួមទាំងព័ត៌មានទាន់ហេតុការណ៍ផ្សេងៗផងដែរ។ កាលពីលើកមុនខ្ញុំធ្លាប់បានរិះគន់ ដល់អ្នកគ្រប់គ្រងនេះ ដែលក្បាលរឹងមិនព្រមប្រើប្រាស់អក្សរយូនិកូដដែលជាប្រភេទពុម្ពអក្សរខ្មែរស្ដង់ដា សម្រាប់ប្រទេសកម្ពុជា។
រាល់លើកខ្ញុំមិនសូវចូលចូលចិត្តទំព័ររបស់ដើមអម្ពិល ប៉ុន្មានទេ ព្រោះមិនព្រមប្រើអក្សរខ្មែរយូនិកូដ ដោយគេប្រើប្រាស់តែប្រភេទអក្សរ លីមូន ហើយមិនមែនជាប្រភេទស្ដង់ដា។ ជាការពិតណាស់ យូនិកូដពិតជាល្អសម្រាប់ប្រើប្រាស់ លក្ខណៈតួអក្សរក៏ស្អាតមិនចាញ់ លីមូនប៉ុន្មានឡើយ ហើយយូនិកូដ ផ្ដល់ប្រយោជន៍ច្រើនជាងអក្សរលីមូនដូចជាៈ អាចធ្វើអោយអ្នកប្រើប្រាស់ ងាយស្រួលស្វែងអក្សរផ្សេងជាភាសាខ្មែរ ដូចជាតាមរយៈ Google.com ដោយយើងអាចវាយពាក្យជាភាសាខ្មែរដើម្បីស្វែងរកអត្ថបទនានា។
ហេតុដូចបានជម្រាបជូនខាងលើនេះ ខ្ញុំគិតថាគេហទំព័រ ដើមអម្ពិលបានប្ដូរពីការប្រើប្រាស់លីមូន មកជា យូនិកូដនេះពិតជាធ្វើអោយមិត្តអ្នកអានសប្បាយចិត្តជាក់ជាមិនខាន។ ពិសេសជាងនេះទៅទៀតនោះគឺ គ្រប់ទាំងអ្នកដែលធ្លាប់គាំទ្រទំព័រ ដើមអម្ពិល កាន់តែមានភាពងាយស្រួលជាងមុនក្នុងការតាមដាន ព័ត៌មានផ្សេងដោយប្រើប្រាស់កម្មវិធីអានសារផ្សេងៗ ក៏ដូចជាការប្រើប្រាស Google Reader ឬ RSS ផ្សេងៗផងដែរ។
ខ្ញុំសូមគាំទ្រទាំងស្រុងចំពោះគេហទំព័រដើមអម្ពិលដែលបានធ្វើទំនើបកម្មថ្មីនេះ ព្រោះក៏អាចចាត់ទុកថាជួយលើកស្ទួយដល់អក្សរខ្មែរស្ដង់ដា បានមួយកម្រិតទៀតផងដែរ។ ថ្វីត្បិតតែពេលនេះ ដើមអម្ពិលនៅមិនទាន់បានកែប្រែទាំងស្រុង ព្រោះមានអត្ថបទ មួយចំនួននៅប្រើប្រាស់អក្សរលីមូន ប៉ុន្តែនេះប្រហែលជាអាចមកពីអត្ថបទទាំងនោះជាអត្ថបទដែលធ្លាប់បានចុះផ្សាយមុនៗ ដែលនៅសេះសល់តែប៉ុណ្ណោះ។
សង្ឃឹមថាក្នុងពេលឆាប់ៗខាងមុខនេះ ដើមអម្ពិលនឹងបន្តការប្រើប្រាស់ អក្សរយូនិកូដជារៀងរហូត..តរៀងទៅអើយ សាធុរ! សាធុរ! ។
ឥឡូវនេះដើមអម្ពិលបានប្ដូរហើយ នៅសល់តែវេបសាយ Everyday មួយទៀតដែលមិនទាន់បានប្ដូរ ក្នុងនាមខ្ញុំជាកូនខ្មែរម្នាក់ ដែលស្រលាញ់អក្សរស្ដង់ដាសម្រាប់កម្ពុជា ក៏ដូចជា កូនខ្មែរមួយចំនួនទៀតដែលចូលចិត្តលើកស្ទួយវិស័យព័ត៌មានវិទ្យា សង្ឃឹមថា Everyday.com.kh នឹងចូលរួមក្នុងអភិវឌ្ឍអក្សរខ្មែរជាមួយពួកខ្ញុំទៅចុះ។
ជាចុងក្រោយខ្ញុំមានមតិមួយទៅចុះ តែមិនដឹងថា ដើមអម្ពិលនឹងធ្វើឬអត់ នោះទេ! ដើម្បីបង្កើតភាពងាយស្រួលបន្ថែមទៀតនោះ ដើមអម្ពិលអាចបង្កើត ទំព័រក្នុងហ្វេសប៊ុក (Facebook Page) ដើម្បីអោយជនជាតិខ្មែរទាំងអស់អាចចុច like ដើម្បីគាំទ្រ ដែលអាចធ្វើអោយកាន់តែមានភាពងាយស្រួលក្នុងតាមដានមើលចំណងជើងផ្សេងៗជាអក្សរខ្មែរក្នុងទំព័រ ហ្វេសប៊ុក ហើយអាចផ្ដល់ជា Comments ផ្សេងផងដែរ។ ចប់៕
មួយៗនាំគ្នាថាឲ្យគេពេក ទ្រាំមិនបាន ហេហេ…
គេថាព្រោះចង់អោយល្អ
អាហ្នឹងហើយគេហៅរិះ គុនដោយស្ថាបនា!
សង្ឃឹមថានឹងបានរហូត ហើយបានល្អដូចកាសែតលើបណ្តាញផ្សេងៗទៀតចុះ!
នៅសល់មួយមុខទៀតគឺ ផ្សាយពាណិជ្ជកម្ម!ហេហេហេ រឿងផ្សាយនេះជាសិទ្ធរបស់គេទេ អត់ហ៊ានរិះគន់ឡើយ ព្រោះបើគ្មានផ្សាយពាណិជ្ជកម្មច្បាស់ជាផ្កាប់ឆ្នាំងបាយ មិនខានរ៉េ
@បងក្មេងស្រែ ត្រូវតែរហូត។ គេមិនទំនេរទៅអង្គុយដូរចុះដូរឡើងទេ មិនចឹង? ហេសហេស
ចូច គំនិតល្អ